Barazimi ndaj Leçes sa ka shtuar më shumë presionin për Motën i cili është me sytë nga infermieria me shpresën se po rikthehet ndonjë nga të dëmtuarit. Sipas të dhënave, situata e çdo lojtari po monitorohet ditë pas dite, duke përjashtuar këtu Bremer dhe Kabal që sapo janë operuar dhe kanë mbyllur sezonin.
Gjithashtu edhe Milik i cili po rikuperohet dhe ende i duhet pak kohë për t’u rikthyer. Kështu në fokus janë pjesa tjetër e lojtarëve të cilët mund të kthehen nga momenti në moment, pasi janë përjashtuar dëmtimet serioze dhe më shumë kanë lodhje muskulore.
Gjithçka varet nga dhimbjet e çdo individi. Megjithatë trajneri shpreson të jetë në gjendje të takojë sërish sa më shpejt Vlahoviçin, golashënuesi më i mirë i Juves, i cili është jashtë që prej 18 nëntorit kur u dëmtua para përfundimit të ndeshjes SerbiDanimarkë. Numri 9 i Juventusit ka dy javë që është jashtë. Duglas Luiz e gjen veten në të njëjtën situatë, pasi ndjeu një dhimbje para ndeshjes Juve-Shtutgart më 22 tetor. Të fundit që u ndalën, sërish për shkak të lodhjes së muskujve, ishin Nikolo Savona, gjatë Aston Vila-Juve dhe Ueston Mekeni.
Për të dy këta lojtarë do të jetë e vështirë që të rikthehen që të shtunën, megjithatë shumë varet nga dhimbja e cila është subjektive. Niko Gonzalez dhe Adziç janë dy lojtarët e tjerë. Argjentinasi ka dy muaj që është jashtë për shkak të një dëmtimi të kofshës së djathtë, ndërsa malazezi pësoi një dëmtim më 8 nëntor. Por kur mund të rikthehen këta lojtarë? Për Vlahoviçin ka shpresa se do të rikthehet në sfidën e radhës ndaj Bolonjës. Për pjesën tjetër edhe pse mund të kthehen nga momenti në moment dyshimet janë se mund të mos arrijnë dot të kapin sfidën e radhës.
PANORAMASPORT.AL
