Jonathan David është një nga emrat më të nxehtë të merkatos që po afrohet, dhe shumë klube të mëdha evropiane janë në garë për sulmuesin kanadez të Lille.
Me kontratën që i skadon në qershor dhe një sezon mbresëlënës pas, 25 gola dhe 11 asistime në të gjitha kompeticionet, David është bërë objektiv i dëshiruar për ekipe si Liverpool, Arsenal, West Ham, Newcastle dhe Marseille.
Por, sipas burimeve nga Anglia, është Interi që aktualisht është më në avantazh. Klubi zikaltër, që do të përballet me largimin e dy sulmuesve në fund të sezonit, Correa dhe Arnautovic, po kërkon të rindërtojë repartin ofensiv rreth Lautaros dhe Thuramit.
Drejtuesit e Interit thuhet se kanë intensifikuar kontaktet me përfaqësuesit e lojtarit dhe tashmë kanë paraqitur një ofertë konkrete: një kontratë pesëvjeçare me vlerë 4.5 milionë euro në vit, që me bonuset mund të arrijë një shifër edhe më të lartë.
