Shumë zëra qarkulluan për ditë me radhë se klube nga Premier League kërkonin Simone Inzaghin si trajner, por CEO i Interit, Marotta, ka folur përpara ndeshjes së djeshme ndaj Atalanta dhe ka konfirmuar se trajneri italian do të jetë edhe për disa vite tek Inter.
“Inzaghi ka bërë një punë të shkëlqyer dhe vetëm për meritë të tij, sot gëzon respektin e të gjithë botës së Interit. Padyshim që duam të vazhdojmë gjatë bashkëpunimin me të, pasi na bindin jo vetëm rezultatet, por edhe mënyra se si ai punon.
Kontrata skadon në 2025, por ne do të negociojmë rinovimin në kohën e duhur, pasi tani jemi të përqëndruar te pjesa më vendimtare e sezonit.
Ne jemi të kënaqur me të dhe ai është i lumtur tek Interi, ndaj kontrata është një faktor plotësues”, u shpreh Marotta.
