Marion Jones, dikur atletja më e shpejtë në botë, ka ndarë një video shqetësuese në Instagram, ku shihet duke luftuar për të zbritur disa shkallë, ndërsa pranon se “gjunjët e saj mezi po mbahen”.
Ish-sprinterja amerikane, 50 vjeçe, fitoi tri medalje të arta në Lojërat Olimpike të Sidneit në vitin 2000, pas suksesit të saj në garën e 100 metrave, që e bëri në atë kohë gruan më të shpejtë në botë.
Megjithatë, në vitin 2007, asaj iu hoqën medaljet pasi u zbulua se kishte përdorur substanca të ndaluara për përmirësim performance. Një vit më vonë, ajo u dënua me gjashtë muaj burg për shkak të gënjeshtrave që kishte thënë lidhur me përdorimin e steroideve.
Që nga lirimi i saj në shtator të atij viti, Jones është përballur me shumë probleme personale. Në vitin 2020, ajo u diagnostikua me një sëmundje autoimune të quajtur neuromyelitis optica, e cila e paralizoi përkohësisht dhe fillimisht e la të paaftë për të ecur.
Në videon e fundit të publikuar në rrjetet sociale, Jones shihet duke zbritur me vështirësi shkallët, ndërsa dëgjohet duke thënë:
“Gjunjët po mbahen me zor, familje… por ende qëndrojmë në këmbë.”
Në përshkrimin e postimit, ajo shkroi me ironi:
“Gjithmonë është pyetja ‘A je ti Marion Jones?! Ti ishe gruaja më e shpejtë në botë njëherë!’ dhe kurrë ‘Si janë gjunjët e tu?’”
Kjo paraqitje ka shqetësuar shumë ndjekësit, të cilët i kanë shprehur mbështetjen dhe urimet për shërim ish-kampiones që dikur dominonte pistat e atletikës botërore.
