Ish-mesfushori i Manchester United, Tom Cleverley ka njoftuar tërheqjen nga futbolli në moshën tridhjetë e tri vjeçare, duke përmendur si shkak lëndimet e vazhdueshme.
Ish-reprezentuesi anglez së fundmi ishte kapiten i Watfordit, ku i ishte bashkuar ekipit të Championship në formë huazimi nga United gjatë sezonit 2009-10.
“Sot po njoftoj tërheqjen time nga futbolli si lojtar aktiv. Viti i fundit ka qenë jashtëzakonisht i vështirë ku jam përpjekur për të kapërcyer pengesat e dëmtimit”, është shprehur ish-fituesi i Premier Leagues në një deklaratë të shtunën. “Për fat të keq nuk kam kapacitetin për të performuar më shumë”.
Cleverley gjatë periudhës së tij gjashtëvjeçare e gjysmë në Watford ka bërë 181 paraqitje, duke shënuar nëntëmbëdhjetë gola dhe duke regjistruar pesëmbëdhjetë asistime..
