Demetrio Albertini, ka folur për “Tuttosport” mbi të tashmen dhe të ardhmen e kuqezinjve. Ish-mesfushori i Milanit, nuk i ka kursyer vërejtjet dhe këshillat për kuqezinjtë.
Çfarë mendoni për lamtumirën e Piolit nga Milani?
Stefano bëri shumë, shumë më tepër nga sa pritej. Ndoshta ai do të kishte qëndruar me dëshirë edhe një vit, por klubi zgjodhi ndryshe dhe tani duhet të shohim përpara.
Si e gjykoni zgjedhjen e Paulo Fonsekës?
Kam lexuar statistikat e tij. Ai mbledh shumë pikë dhe i ndihmon lojtarët e rinj të rriten. Është dikush që flet pak dhe shpesh në botën e futbollit ata që heshtin nuk gjykohen për atë që janë. Ai duket si një trajner i prirur për të rritur asetet e klubit. Shumë do të varet edhe nga merkato, nga skuadra që do të ndërtohet për të.
Po milanistët që do të donin Antonio Konten?
Por trajnerët nuk mjaftojnë për të fituar. Duhen edhe lojtarë. Aurelio De Laurentis ndoshta e pranoi fajin dhe mori më të mirin në treg. Vetëm rezultatet do të tregojnë nëse Konte është më i miri.
A do të kuptohen ambiciet e Milanit nga zgjedhjet e merkatos?
Këtë vit Milani ishte jashtë loje thuajse menjëherë dhe megjithatë tifozët nuk pushuan së mbushuri “San Siro”-n. Kjo është arsyeja pse qartësia është e nevojshme. Duhet ndërtuar diçka që te lejojë ekipin të synojë kampionatin. Nëse je Milani, vendi i katërt nuk mjafton.
Pra klubi bën mirë që këmbëngul për një sulmues të ri?
Ka shumë vite që mungon, objektivisht duhet investuar. Nuk është aq e lehtë të gjesh gjithmonë Olivie Zhirutë e radhës. Është një rol delikat, por dikush duhet gjendur sepse prej aty, nga numri 9, kalojnë të gjitha rezultatet e një ekipi.
Çfarë mendoni për Zirkzen te Milani?
Duhet të pyesim veten para së gjithash tek cili Milan? Nëse është një Milan që duhet të rritet së bashku për të arritur fitoren apo një Milan që duhet të fitojë menjëherë.
Si do t’ju dukej një treshe e mundshme me holandezin të mbështetur nga Pulisiçi dhe Leao?
Ideja më pëlqen. Nuk është e nevojshme vetëm përvoja, guximi i të riut mund të jetë gjithashtu shumë i rëndësishëm dhe i dobishëm për përshpejtimin e një procesi që më pas të çon drejt suksesit.
Mund të bëhet më në fund Leao lider i Milanit?
Ai vetëm duhet të punojë në vazhdimësi pasi talentin ia njohim. Një lider mund të jetë edhe në dhomat e zhveshjes nëse ai është i tillë, jo domosdoshmërisht vetëm në fushë.
PANORAMASPORT.AL
