Ish-ylli i Çelsit, Adrian Mutu, ka folur hapur për problemet e tij jashtë fushe, të cilat i shkatërruan karrierën në Londrën Perëndimore. Mutu luajti vetëm një vit në “Stamford Bridge” dhe u pezullua nga futbolli për shtatë muaj, pasi doli pozitiv në testin antidoping, për përdorim të kokainës.
Ishte një periudhë makthi për fantazistin rumun, i cili nuk arriti të përmbushte pritshmëritë e mëdha pas transferimit nga skuadra e Parmës. Tani, Mutu ka reflektuar mbi pezullimin e tij për drogë dhe ka këmbëngulur se po të mos e kishte marrë substancën, ai mund ta kishte fituar “lehtësisht” “Topin e Artë”.
Në një intervistë për “The Telegraph”, ai tha: “Marrja e kokainës gjatë kohës sime te Çelsi ishte vendimi më i keq që mund të kisha marrë në karrierën time. Isha i vetëm dhe i trishtuar, por as depresioni dhe asgjë tjetër nuk i justifikon veprimet e mia. Zero tolerancë, – kjo ishte politika e Çelsit në lidhje me drogat. Dhe mendoj se është e drejtë. Bëra një gabim, dola nga rruga e duhur dhe pagova çmimin për këtë.
U zura në befasi. Nuk isha mësuar me atë jetë. Nuk isha i përgatitur. Erdha te Çelsi në një periudhë të trazuar në jetën time personale dhe u gjenda i mbërthyer mes shumë justifikimeve dhe gënjeshtrave. Isha shumë i ri dhe shumë i vetmuar.
Kam reflektuar për këtë shumë herë. Besoj se për më shumë se një sezon, isha ndër lojtarët më të mirë në botë, kështu që mund ta kisha fituar ‘Topin e Artë’ lehtësisht. Por vendimet e këqija më penguan ta bëja këtë. Mundohem të mos e fajësoj veten për këtë”.
RRUGËTIMI – Mutu mbërriti për herë të parë në kampionatet kryesore të Evropës tek Interi, duke u transferuar kur ishte 20 vjeç në janar të vitit 2000, përpara se të kalonte te Parma 3 vjet më vonë, pas një viti te Verona. Te Parma, talenti i tij shpërtheu dhe ai justifikoi 10 milionë eurot që ata paguan. Ai shënoi 22 gola në 36 ndeshje gjatë sezonit 2002-03, përpara se edhe një herë tjetër, të ndryshonte skuadër.
Rritja e tij e jashtëzakonshme e katapultoi atë në Premier Ligë, ku Roman Abramoviç sapo kishte marrë drejtimin e Çelsit. Në fund të vitit 2003, ai madje arriti të nominohej për “Topin e Artë”, duke marrë të njëjtën numër votash si legjendat Ronaldinjo, Inzagi, Jan Koler dhe Françesko Toldo. Fatkeqësisht, kjo nuk do të zgjaste. Në fakt, ai do të shënonte vetëm dy gola të tjerë në kampionat atë sezon në 22 ndeshjet e ardhshme, duke u kthyer shpejt nga një sensacion në një dështim.
Dhe ardhja e Murinjos në verën e vitit 2004 do të shënonte fundin e karrierës së tij në Londrën Perëndimore. Portugezi kishte dëgjuar për stilin e jetës së tij si një djalë festash. Pavarësisht këmbënguljes së Abramoviçit se Mutu nuk ishte në shitje, ai u ul në stol pas një faze përgatitore me dyshimet se po përdorte kokainë. Ai më pas doli pozitiv për përdorim të kokainës në shtator 2004 dhe u pezullua nga futbolli për 7 muaj, duke i dhënë fund karrierës në “Stamford Bridge”.
ANDROKLI DRALO-PANORAMASPORT.AL
