Lautaro Martinez është graduar zyrtarisht si kapiteni i ri i Interit. Sulmuesi argjentinas është i vetmi që ka 6 sezone me zikaltërit nga skuadra aktuale dhe tashmë duhet të udhëheqë skuadrën drejt titullit, gjë të cilën ai vetë e ka pranuar në një intervistë për “Gazzetta dello Sport”, ku edhe foli për Lukakun.
“Të jesh kapiten të jep një përgjegjësi më të madhe dhe një dëshirë tjetër për të ngritur lart trofeun. Dua të jem kapiten i titullit kampion. Ta nisim nga finalja e Stambollit, aty ku kemi lënë një imazh tjetër për veten tonë.
Lukaku? Është e vërtetë, më ka zhgënjyer shumë. Në këto ditë kaosi kam tentuar shumë që ta telefonoj për të ditur diçka më shumë por ai kurrë nuk më është përgjigjur, ashtu si edhe shokët e tjerë. Pas shumë vitesh bashkë dhe shumë gjërave që kemi kaluar, ndihem i zhgënjyer. Për hir të Zotit, është zgjedhja e tij dhe i uroj më të mirat”, u shpreh Lautaro.
PANORAMASPORT.AL
