Pas veprimit të gabuar në fushë, vijnë edhe fjalët e pendesës. Kenan Jildiz, numri 10 i Juventusit, ka reaguar përmes një postimi në rrjetet sociale pas përjashtimit me karton të kuq në ndeshjen kundër Monzës, një episod që rrezikon t’i kushtojë rëndë, si personalisht, ashtu edhe skuadrës në garën për një vend në Champions.
Sulmuesi turk do të mungojë të paktën në sfidën e radhës ndaj Bolonjës, ndërsa pezullimi i mundshëm për tri ndeshje do ta detyronte të humbiste edhe përballjen direkte ndaj Lacios, dy takime me peshë të madhe në fundin e sezonit.
Në një “story” në Instagram, Jildiz ka kërkuar ndjesë për atë që ndodhi, duke theksuar se nuk ishte një gjest i qëllimshëm dhe se nuk përfaqëson as karakterin dhe as mënyrën se si ai e jeton futbollin.
“Jam thellësisht i zhgënjyer për atë që ndodhi në fushë. Nuk ishte qëllimi im të dëmtoja kundërshtarin dhe i kërkoj ndjesë. Dua të bëj të qartë se ishte një veprim përtej asaj që doja të bëja dhe që nuk reflekton natyrën time. U kërkoj ndjesë shokëve të ekipit, stafit, klubit dhe tifozëve, dhe i falënderoj për mbështetjen e tyre, që nuk ka munguar as tani”, shkroi Jildiz.
PANORAMASPORT.AL
