Pasi siguruan shërbimet e “bomberit”, Harry Kane, “bavarezët” e Bayern Munich kërkojnë një tjetër përforcim nga skuadra e Tottenham, kësaj radhe në mbrojtje, repart në të cilin, tekniku Ange Postecoglu ka konfirmuar dyshen, Micky van de Ven-Cristian Romero, si titullarë të padiskutueshëm.
I preferuari i Thomas Tuchel në radhët e Spurs është qendërmbrojtësi, Eric Dier, i cili mund të joshet pas suksesit të menjëhershëm që Kane po kalon në Bundesliga dhe me 29-vjeçarin, që është në prag “skadence” me londinezët gjithçka mund të ndodhë shumë shpejt.
Sipas raportimeve më të fundit të mediave gjermane e britanike, Dier mund të kalojë te Bayern në fundin e sezonit me parametra zero, nëse nënshkruan një parakontratë që në merkaton e janarit, mirëpo mbrojtësi dëshiron të luajë për Anglinë në Kampionatin Evropian të futbollit, verën e ardhshme, dhe tashmë na mbetet për të parë nëse Dier do të qëndrojë në Premier League apo do të kalojë dikur tjetër.
