Joao Pedro kërkoi një pseudonim të ri për treshen sulmuese të Chelsea, e cila po kalon një formë të shkëlqyer, ndërsa fliste për mirëkuptimin e tij në rritje me Cole Palmer dhe Morgan Rogers. Treshja është pagëzuar me emrat “JP Morgan” dhe “CPR” nga tifozët, pas një nisjeje mbresëlënëse të sezonit të ri.
Sulmuesi brazilian ka regjistruar tashmë tre gola dhe tre asiste këtë sezon, ndërsa organizatori Cole Palmer ka katër gola e dy asiste, dhe Morgan Rogers ka kontribuar me tre gola e katër asiste që kur u bashkua nga Aston Villa. Braziliani beson se të tre e plotësojnë mirë njëri-tjetrin.
“Morgan është një lojtar shumë i aftë; ai mund të driblojë dy ose tre kundërshtarë dhe ta mbajë topin. Kjo është ajo që presim prej tij dhe ai e ka nisur shumë mirë. Sa i përket Cole, unë gjithmonë përpiqem t’ia pasoj topin në këmbë, ndërsa Morgan ia pasoj më shumë në hapësirë, për ta lejuar të hyjë në situata ‘një-kundër-një’”, deklaroi Pedro.
Më tej, braziliani shtoi: “Puna ime është thjesht të vrapoj dhe ata do të më gjejnë. Unë vrapoj dhe duhet të shënoj. Duhet të jem gati kur Cole merr topin dhe të jem në pozicionin e duhur për të bërë vrapimin dhe për të shënuar, sepse përndryshe ai më vonë do të thotë: ‘Hej, Joao, duhet të më japësh asiste’”.
“Ai mund të shënojë, të pasojë, të shënojë nga goditjet e lira; mund të bëjë gjithçka. Kjo është ajo që e bën të veçantë. Ai është një lojtar i veçantë. Mendoj se juve ju duket si një njeri i mbyllur, por me ne ai është shumë gazmor, bën shaka. Unë dhe Morgan jemi shumë të afërt me të; ai është një djalë gazmor”, komentoi Joao Pedro.
Pedro ishte më pak entuziast për pseudonimet që tifozët i kanë dhënë treshes: “Duhet të gjejmë një pseudonim shumë të mirë. Mua nuk më pëlqen ‘CPR’, ndërsa Palmer nuk i pëlqen ‘JP Morgan’, kështu që duhet të gjejmë diçka të ndërmjetme për t’i kënaqur të gjithë.”
