Ish-futbollisti i Juventusit, Leonardo Bonuçi ka analizuar situatën te bardhezinjtë, ndërsa nuk la pa përmendur edhe largimin e Maksimiliano Alegrit.
“Hera e fundit që kam biseduar me Alegrin ka qenë në majin e vitit 2023. Secili bën sjelljen që e mendon më të mirën për veten. Për atë që kemi kaluar bashkë në shumë vite, mendoj se ai raport mund të ishte menaxhuar më mirë, edhe pse ai nuk më donte më në skuadër. Nëse e takoj në një lokal do ta përshëndesja, por nuk do ta ftoja për një kafe.
Një rikthim në Torino? Ëndrra ime është të fitoj Championsin si trajner i Juventus duke qenë se si lojar nuk ia dola. Nëse Kielini do të ishte drejtor sportiv, atëherë do të ishte një raport i shkëlqyer profesional dhe miqësor. Por, para së gjithash kemi një rrugëtim për të përfunduar deri sa të mbërrijmë në këtë pikë.
Tiago Mota te Juventus? Më pëlqen, është i drejtëpërdrejtë dhe me personalitet. Ka të gjitha letrat në favor për t’ia dalë me Juventusin dhe për ta udhëhequr skuadrën drejt futbollit modern, por e theksoj se i duhet dhënë kohë. Unë e kam vlerësuar shumë kur ishim në kombëtare, ishte shumë i rëndësishëm në Euro 2012. Mota i ka idetë shumë të qarta”, u shpreh Bonuçi.
PANORAMASPORT.AL
