Juventusi “prenoton” Kessie, lëvizje konkrete për rikthimin e mesfushorit në Itali

Juventusi bën lëvizje konkrete për marrëveshjen me Franck Kessie, me qëllimin për ta pasur mesfushorin në skuadër në qershor. Përfaqësuesit e klubit bardhezi kanë takuar dje në selinë e tyre agjentin e futbollistit nga Bregu i Fildishtë.

Kessie luan aktualisht për Al Ahli dhe mund të lërë Arabinë Saudite për t’u kthyer në Itali, pas eksperiencave që ka pasur më parë me Atalantën dhe Milanin. Lajmi është bërë i ditur nga “Sky Sport”.

Trajneri Luciano Spalletti duket se kërkon eksperiencë në mesfushë dhe Kessie do të ishte një opsion shumë i mirë për bardhezinjtë. Lojtari afrikan ka spikatur sidomos me fanellën e Milanit, duke qenë një nga pikat më të forta të tij disa sezone më parë.