Barcelona nuk është vetëm skuadra që ka shënuar më shumë gola në këto 9 javë të luajtura në La Liga (21), por është edhe skuadra që çon më shumë lojtarë te goli. Në fakt, nuk ka asnjë klub tjetër në pesë ligat kryesore europiane që ka kaq shumë golashënues të ndryshëm. Ksavi Hernandez u ka kërkuar të gjithë lojtarëve të tij që të bëjnë një hap përpara, ai kërkon që ata të guxojnë të gjuajnë dhe ata po binden të zbatojnë urdhrat e tij.
Te Barcelona janë 12 lojtarë të ndryshëm që kanë shënuar të paktën një gol në këtë fillim sezoni. Në La Liga, Girona është më afër saj me 11 rrjeta, që është njëkohësisht në vendin e dytë në pesë ligat më të rëndësishme në Europë për sa i përket këtij treguesi. Në fakt, guximi sulmues i të gjithë skuadrës është një kërkesë e trajnerit nga Terrasa, që kur ai mbërriti në stolin e katalanasve, gati dy vite më parë. Në fakt kjo ka qenë dhe një nga kërkesat e presidentit Joan Laporta, i cili shpesh ia ka përmendur trajnerit të tij se vetëm fitoret nuk mjaftojnë.
Ai pret lojë, futboll argëtues dhe më shumë gola rrjedhimisht. Një kërkesë për të ndjekur udhëzimet e legjendës së Barcelonës, Johan Krojf, që deklaronte: “Në ekipet e mia, portieri është sulmuesi i parë dhe sulmuesi është mbrojtësi i parë”. Dhe Ksavi ndjek rreptësishtë atë thelbin sulmues që bazohet në punën ekipore dhe përkushtimin për një lojë solidariteti. Shpirti vertikal është pjesë e ADN-së së Barcelonës, të cilën ish-mesfushori katalanas e ka rikthyer. Vitin e kaluar, Barça kishte 17 golashënues të ndryshëm në La Liga. Tani janë 12 dhe numërimi vazhdon.
Përgatiti: LEDJO SEFERKOLLI -PANORAMASPORT.AL
