Klubi i Juventusit më në fund ka bërë zyrtar transferimin e qendërmbrojtësit anglez Llojd Kelli, i cili i bashkohet në formë huazimi me të drejtë blerje nga radhët e Njukasëllit.
Falë lëvizjeve të kryera në janar, por edhe dëmtimeve të njëpasnjëshme, Juventusi kishte nevojë urgjente për një qendërmbrojtës ndërsa shqyrtoi profile të ndryshme mes të cilëve edhe Ardian Ismajlin. Por në fund u vendos afrimi i 26-vjeçarit britanik nga Njukasëll.
Marrëveshja mund t’i kushtojë deri në 25 milionë euro Juventusit, në varësi të objektivave të arritur në këtë sezon dhe minutazhit që do të ketë lojtari. Në formulën e huazimit janë përfshirë klauzola që e bëjnë të detyrueshëm transferimin e tij në radhët e bardhezinjve, nëse përmbushen disa objektiva të caktuar apo edhe numër ndeshjesh të luajtura nga lojtari.
PANORAMASPORT.AL
