Në seancën e fundit stërvitore të Italisë, ku janë dhënë udhëzimet e fundit para sfidës së sotme me Shqipërinë, ka marrë pjesë edhe Nikolò Faxholi. Ai u duk jashtë për këtë ndeshje, por dje ka kryer stërvitje dhe ka marrë miratimin për të qenë gati.
Rikuperimi i Barelës ishte certifikuar nga vetë trajneri Spaleti në konferencë shtypi, ndërsa pas seancës së fundit është mësuar se edhe mesfushori i Juventusit është në dispozicion. Gjithçka në rregull edhe për Fratezin, i cili prej dy ditësh ka punuar me grupin. Trajneri Spaleti ka ndonjë dilemë për formacionin. Përpara kapitenit Donaruma do të jenë Di Lorenco dhe Dimarko në krahë dhe Bastoni dhe Kalafiori në qendër. Ky i fundit ka fituar kuota ndaj Buonxhornos.
Në qendër të mesfushës do të jetë dyshja Zhorzhinjo-Barela. Më përpara, Fratezi në qendër dhe Kieza dhe Pelegrini nga krahët, do të mbështesin sulmuesin e vetëm Skamaka. “Sekreti” i modulit të lojës së Italisë, sipas shtypit fqinj, është Federiko Kieza. Spaleti ka lënë të kuptohet se mund të kalojë edhe me një mbrojtje me 3 lojtarë dhe me 2 sulmues.
PANORAMASPORT.AL
