Lautaro Martinez po konfirmohet një nga sulmuesit më të mirë në qarkullim dhe pasi pushtoi Serinë A, dy sezonet e fundit po fiton gjithmonë e më shumë pozicione në arenën ndërkombëtare.
Vetëm 26 vjeç, që nga shpallja kampion bote me Argjentinën, kapiteni i Interit nuk ka ditur të ndalet duke fituar edhe statusin e liderit teknik dhe karizmatik të zikaltërve në dhomat e zhveshjes dhe jashtë saj.
Edhe pse në 2023-shin humbi finalen e Ligës së Kampioneve, një triumf që do ta kishte shenjtëruar më tej, Lautaro ka dëshirën për të provuar sërish dhe nëse paraqitjet e tij e ruajnë këtë nivel, nuk do të ishte aspak çmenduri të vazhdonte të ëndërronte gjëra të mëdha.
Performanca e sulmuesit është përkthyer po ashtu në shifra mbresëlënëse, të cilat e kanë vendosur “demin” në vendin e dytë për sa i përket kontributit në golat e ekipit.
Në këtë vit kalendarik, klasifikimi me kriter shumën e golave dhe asisteve në të gjitha kompeticionet me klubet e shikon Lautaron (37, 30+7) të parakalohet vetëm nga Erling Haland (41, 33+8).
Podiumin nuk mund ta plotësonte dikush tjetër veç Kilië Mbapesë, që mes lojtarëve të 5 kampionateve kryesore në Europë, është i treti pasi me PSG-në e tij ka shënuar 29 herë dhe ka asistuar 6 herë në 2023-shin.
Renditja vazhdon me yjet e tjerë të sulmit, me Herri Kejnin (Totenhem dhe Bajern Mynih) e Mohamed Salahun që kanë marrë pjesë në 34 gola secili, ndërsa Viktor Osimhen, Robert Levandovski dhe Markus Rashford janë ndalur në 30.
Në 10 më të mirët e këtij klasifikimi ka vend edhe për francezin e PSG-së, Randal Kolo Muani (29) dhe Ksavi Simonsin e Lajpcigut (27).
PANORAMASPORT.AL
