Klodian Duro rikthehet në futbollin kosovar si trajner, tashmë për të drejtuar Lirinë e Prizrenit. Pas eksperiencave të mëparshme në Kosovë në krye të Gjilanit dhe Feronikelit, 47-vjeçari do të nisë një aventurë të re në krye të skuadrës prizrenase, që militon në Ligën e parë dhe që këtë sezon synon ngjitjen në elitën e futbollit kosovar.
“Një emër me peshë në futbollin shqiptar vjen në stolin tonë! Klodian Duro – ish-mesfushori legjendar i Kombëtares Shqiptare, me një karrierë të pasur si lojtar në Shqipëri, Turqi, Gjermani, Qipro, Austri – tani sjell përvojën e tij si trajner në Prizren.
Pas eksperiencave si trajner te Kukësi, Feronikeli dhe Gjilani, Duro vjen te FC Liria me vizionin për ta ngritur skuadrën aty ku e meriton”, shkruhet në njoftimin e klubit.
