Në verë, Marash Kumbulla mbërriti te Espanjoli nga Roma në formë huazimi dhe në vetëm pak muaj qendërmbrojtësi i kombëtares kuqezi u kthye në një pjesë themelore në formacionin e skuadrës së drejtuar nga Manolo Gonzalez.
Mbrojtësi shqiptar, i lindur në vitin 2000, spikati në sezonin 2019-2020 me fanellën e Hellas Verona. Me klubin veronez ai shënoi golin e parë në vitin 2019, duke u bërë mbrojtësi i parë i lindur në vitin 2000 që shënon në Serinë A. Pas atij sezoni ku tregoi të gjitha cilësitë e tij, Kumbulla kaloi te Roma për gati 30 milionë euro. Me fanellën “Giallorossa”, ai fitoi Ligën e Konferencës, në finalen që u luajt në Tiranë mes Romës dhe Fejnordit në sezonin 2020-2021.
Në prill të vitit 2023 ai pësoi një dëmtim të ligamentit të kryqëzuar të përparmë që e mbajti jashtë fushës për disa muaj. Më pas me rikthimin nga dëmtimi, ai pati vështirësi në Romë dhe gjatë merkatos së verës që lamë pas mbrojtësi i kombëtares shqiptare u transferua në Spanjë në formë huazimi, duke iu shtuar dhe lojtarëve të tjerë të Shqipërisë që aktivizohen në Spanjë dhe i dyti në La Liga pas Ivan Balliut që luan për Rajo Vajekanon.
Tani, tek Espanjoli, ai ka rifituar besimin dhe formën e nevojshme që i lejon të performojë më të mirën e tij. Marash Kumbulla po rezulton të jetë një pjesë shumë e rëndësishme në mbrojtjen e Espanjolit. Sipas statistikave, në këtë pjesë të parë të sezonit ai është lojtari i Espanjolit me më shumë ndërhyrje (11), blloqe mbrojtëse (14), largime në mbrojtje (61) dhe i dyti në duele ajrore të fituara (20). Kontributi i Marash Kumbullës nuk ka qenë i kufizuar vetëm në fazën mbrojtëse.
Lojtari i përfaqësueses shqiptare kryeson skuadrën edhe në përqindje të pasimeve të suksesshme (86%), duke siguruar qëndrueshmëri në fazën e ndërtimit dhe të trajtimit të topit. Këto rezultate jo vetëm nënvizojnë rikthimin e Kumbullës në një nivel shumë të lartë, por konfirmojnë edhe rolin e tij vendimtar brenda skuadrës.
Megjithatë, sfida e madhe për Kumbullën dhe Espanjolin do të jetë e diela në derbin kundër Barcelonës. Ai dhe skuadra e tij do të përballen me skuadrën me sulmin më të frikshëm në Europë, ku bëjnë pjesë, Robert Levandovski, Lamin Jamal dhe Rafinja, sa për të përmendur disa.
LEDJO SEFERKOLLI-PANORAMASPORT.AL
