Tiago Mota dhe Juventusi humbasin një tjetër element të rëndësishëm në mbrojtje. Testet që Huan Kabal iu nënshtrua ditën e djeshme, siç edhe pritej, konfirmuan atë që të gjithë i druheshin: këputjen e ligamentit të kryqëzuar të përparmë në gjurin e majtë dhe operacioni për të sistemuar dëmin.
Praktikisht sezon i mbyllur për kolumbianin që e kishte nisur mirë këtë sezon të parë në Torino. Me Bremer gjithashtu në infermieri deri në fund të sezonit, klubi do të detyrohet të ndërhyjë në merkaton të janarit për të mbushur boshllëkun e krijuar në repartin, sipas statistikave, më të mirë në të gjithë Serinë A.
Për momentin mbeten ‘vetëm’ Kalulu, Gati, Kambiazo, Danilo, Savona dhe Rohi (le të shtojmë edhe spanjollin e lindur në 2006 Zhil Puçe): shumë pak për të përballuar një sezon të tërë plot angazhime dhe ngjarje të papritura. Sidoqoftë, nga klubi bëjnë të ditur se nuk do të afrohen lojtarë pa kontratë.
PANORAMASPORT.AL
