Kiran MekKena është që tani një idhull në Ipsuiç. Trajneri 37-vjeçar bëri mrekullinë duke siguruar dy ngjitje radhazi të skuadrës së njohur angleze teksa brenda dy vitesh e çoi nga kategoria e tretë, në Premier Ligë.
Trajneri i cili po ndiqet me shumë interes nga klubet e mëdha angleze, padyshim që do të provojë shanset e tij me klubin që ktheu në elitë pas 22 vitesh dhe ky është lajmi më i mirë për tifozët e Ipsuiç. AI ka krijuar një lidhje të ngushtë me klubin dhe qytetin, siç e tregoi gjesti i jashtëzakonshëm që ka bërë një ditë pas festës që skuadra bëri me autobus të hapur mes mijëra tifozëve.
Pas kësaj festë, shumë rrugë të qytetit ishin mbushur me mbeturina të lëna pas nga tifozët, teksa Këshilli i qytetit bëri të ditur se do të organizonte pastrimin e tyre edhe me grupe vullnetarësh. Por pakkush priste që në ditën pas festës, të ishte pikërisht MekKena një nga vullnetarët.
Foto të ndryshme në rrjetet sociale të atyre që kishin dalë në rrugë vullnetarisht të pastronin mbeturinat, shfaqnin edhe trajnerin e Ipsuiç teksa po pastronte qytetin pas dy ditëve festë të çmendur. Një gjest që i ka dhënë edhe më shumë statusin e heroit teknikut mes mbështetësve të skuadrës.
PANORAMASPORT.AL
