Trajneri i ekipit të Kosovës në xhudo, Driton Kuka, ka vlerësuar lart paraqitjen e ekipit në Tbilisi të Gjeorgjisë, duke theksuar vazhdimësinë e sukseseve të xhudos kosovare në arenën ndërkombëtare.
Kosova i ka përmbyllur garat në Kampionatin Evropian për të rritur në Tbilisi me një tjetër rezultat të rëndësishëm, duke konfirmuar edhe një herë nivelin e lartë të këtij sporti në vend.
Distria Krasniqi ka spikatur me paraqitjen e saj, duke siguruar medaljen e artë të 11-të evropiane për Kosovën dhe duke vazhduar një traditë tashmë 14-vjeçare suksesi, me mbi 30 medalje të fituara në total.
Në këtë kampionat, paraqitje shumë të mirë ka shënuar edhe Akili, i cili regjistroi tri fitore dhe një humbje, duke qenë në garë për medalje dhe duke u renditur përfundimisht në vendin e pestë.
Ndërkohë, Dardani dhe Fatjona arritën deri në mesin e 16 më të mirëve, duke dëshmuar potencial dhe përkushtim, ndërsa Erza dhe Laura u eliminuan në fazat e hershme, pavarësisht përgatitjeve të mira paraprake.
Në përfundim, Kuka theksoi se xhudo vazhdon të mbetet sporti më i suksesshëm olimpik për Kosovën, duke falënderuar të gjithë për mbështetjen e vazhdueshme, si dhe duke shprehur ngushëllime për familjet e prekura nga tragjedia në Malishevë.
