Një ngjarje e rëndë ka tronditur futbollin gjerman mbrëmjen e djeshme, pak minuta para fillimit të ndeshjes së Kupës së Gjermanisë midis Leipzigut dhe Energie Cottbus, skuadër e kategorisë së tretë. Një tifoz i Leipzigut pësoi një arrest kardiak teksa po hynte në stadium dhe, pavarësisht ndërhyrjes së shpejtë të mjekëve, humbi jetën pak më vonë në spital.
Lajmi i trishtë u përhap në shkallët e stadiumit gjatë minutave të para të takimit dhe më pas mbërriti edhe te futbollistët në pushimin e ndeshjes. Klubi gjerman konfirmoi ngjarjen me një njoftim zyrtar:
“Fatkeqësisht, një prej tifozëve tanë pësoi një ndalesë kardiake ndërsa po hynte në stadium. Pak më parë kemi marrë lajmin e dhimbshëm se ai ka ndërruar jetë në spital. Për këtë arsye, dhe nga respekti për familjen e tij, do të kufizojmë në minimum mbulimin tonë të drejtpërdrejtë nga Cottbus. Kërkojmë mirëkuptimin e të gjithëve, sepse në momente të tilla futbolli kalon në plan të dytë. Klubi shpreh ngushëllimet më të sinqerta për familjen e të ndjerit.”
Pas fitores 4-1, lojtarët e Leipzigut u drejtuan te sektori i tifozëve për të shprehur ngushëllimet e tyre. Kapiteni David Raum foli me trishtim pas ndeshjes:
“Kemi fituar, por mendimet dhe ngushëllimet tona shkojnë për familjen e tifozit që humbi jetën. Sot, rezultati nuk ka rëndësi.”
Një mbrëmje që duhej të ishte festë për Leipzigun u shndërrua në dhimbje, duke kujtuar se përtej futbollit, jeta mbetet gjithmonë mbi gjithçka.
