Në shumë qytete të Marokut, vendit organizator të Kupës së Kombeve të Afrikës 2025 (21 dhjetor-18 janar), janë ndezur protesta të dhunshme për shkak të shpenzimeve që ka bërë qeveria e shtetit në fjalë për organizimin e eventit.
Protestuesit kanë zbritur në sheshe pasi kërkojnë më shumë vëmendje nga ana e qeverisë në sektorë siç janë shëndetësia, arsimi dhe transporti publik.
Javën e kaluar, zëdhënësi i Ministrisë së Brendshme, Rachid El Khalfi, tha se 409 persona ishin arrestuar në protesta, të cilat janë shndërruar në të dhunshme në disa zona.
Qeveria e Marokut konfirmoi se 20 protestues dhe 260 oficerë policie ishin plagosur, ndërsa disa automjete policie ishin djegur gjithashtu në përleshje. Tre persona u qëlluan gjithashtu për vdekje kur u përpoqën të sulmonin një stacion policie.
“Jemi të bindur se Kupa e Kombeve të Afrikës do të zhvillohet sipas planit. Maroku është plani A, Maroku është plani B dhe Maroku është plani C. Konfederata Afrikane e Futbollit do të bashkëpunojë dhe do të punojë me qeverinë dhe të gjithë qytetarët e Marokut për të pritur AFCON-in më të suksesshëm në histori”, tha kreu i Konfederatës Afrikane të Futbollit, Patrice Motsepe.
