Carlos Alcaraz është paksa i shqetësuar për një përplasje të mundshme orarit të ndeshjes së tij në Wimbledon me orarin e ndeshjes së kombëtares së Spanjës të martën.
Nëse ndeshja e kampionit mbrojtës kundër Tommy Paul luhet në mbrëmje, ka shumë mundësi që ai të mos jetë në gjendje të shikojë gjysmëfinalen e Spanjës kundër Francës në Kampionatin Evropian të futbollit.
“Shpresojmë që të martën nuk do të luajmë në të njëjtën kohë”, tha spanjolli. “Shpresoj se do të mund të shoh pak nga ndeshja.”
Është një çështje e rishfaqur pasi sa herë që Wimbledon përkon me një turne të madh futbolli si Kupa e Botës ose Europiani, lojtarët shpesh e gjejnë veten duke e mbajtur një sy se si po ecën ekipi kombëtar i vendit të tyre, edhe pse duhet të fokusohen në ecurinë e tyre në turneun Grand Slam.
Edhe turma përfshihet në ndeshjet e Europianit, siç zbuloi Novak Gjokovic të shtunën.
Ndeshja e tij në raundin e tretë u luajt ndërsa Anglia u përball me Zvicrën në çerekfinalen e Euro 2024 dhe Gjokoviç u shpreh se turma e fushës qendrore nuk ishte plotësisht e përqendruar në tenis. Kur lajmet u filtruan se Anglia kishte fituar një penallti për t’u avancuar, gjë e rrallë kjo për një vend që ka një histori për humbjen e gjuajtjeve të tilla, turma brohoriti aq fort sa kundërshtarit të Gjokoviçit, Alexei Popyrin iu desh të ndërpresë shërbimin e tij dhe të ndalonte për një moment.
Shtatë herë kampioni, Serbia e të cilit humbi nga Anglia në fazën e grupeve, e kuptoi menjëherë atë që kishte ndodhur dhe shfrytëzoi momentin për të goditur një top drejt rrjetës. Popyrin e kapi gjithashtu momentin dhe imitoi një portier duke bërë një pritje të bukur të topit.
“Unë supozova se ishte një penallti mes Anglisë dhe Zvicrës,” tha Gjokovic në një intervistë në fushë pas fitores së tij. “Ndihej sikur për një set e gjysmë, turma me të vërtetë donte të dinte se cili është rezultati në ndeshjen e futbollit. A fitoi Anglia në fund?”
Kur Gjokoviçit iu tha se Anglia me të vërtetë kishte fituar, ai u përgjigj: “Kjo është arsyeja pse ju keni qëndruar.”
Alcaraz tashmë i është dashur të riorganizojë disa nga përgjegjësitë e tij në Wimbledon për shkak të futbollit. Ndeshja e tij e raundit të tretë të premten përfundoi ndërsa Spanja po luante me Gjermaninë në çerekfinalen e Euro 2024 dhe ai me shpejtësi kërkoi rezultatin gjatë intervistës së tij pas ndeshjes në Center Court përpara se të shkonte për të parë pjesën tjetër të lojës. Më pas, kur ndeshja e Spanjës shkoi në 30 minuta kohë shtesë, një njoftim u bë menjëherë në qendrën e shtypit të Wimbledon se konferenca e planifikuar e shtypit e Alcaraz, e cila sapo do të fillonte, ishte shtyrë me gjysmë ore.
Edhe lojtarët, vendet e të cilëve nuk po luajnë në Euro, e kanë ndjekur nga afër turneun. Dy herë nënkampionia e Wimbledon, Ons Jabeur, e cila është nga Tunizia, tha javën e kaluar se penalltia e humbur e Cristiano Ronaldos për Portugalinë kundër Sllovenisë e bëri atë të qajë sepse ajo e do shumë portugezin.
Anglia luan me Holandën të mërkurën në gjysmëfinalen e Euro 2024, por Wimbledon nuk kishte në plan t’i kushtonte asnjë nga ekranet e tij futbollit.
“Kur vini në Wimbledon, vini për të parë tenis”, tha të martën e kaluar Michelle Dite, drejtoreshë e operacioneve në All England Club. “Ne mendojmë se është shumë e rëndësishme. Kjo është ajo për të cilën njerëzit kanë blerë biletën e tyre, kështu që ne do të ruajmë mbulimin e tenisit në çdo kohë në terren.”
Alcaraz ka një lidhje personale me disa nga lojtarët e Spanjës dhe tha se është mik i mirë me Alvaro Morata, sulmuesi kryesor i skuadrës.
“Tani për tani është koha për t’i mbështetur ata, pasi e di që ata më mbështesin kur jam duke luajtur ndeshje,” tha Alcaraz. “Eshte rradha ime.”
