Galatasaray, që është në prag të fitimit të titullit të tretë radhazi në Superligën e Turqisë, tashmë ka kthyer vëmendjen nga objektivi madhor: sukseset në Evropë.
Për ta realizuar këtë ambicie, drejtuesit e klubit kanë vendosur të përforcojnë ndjeshëm skuadrën me emra të mëdhenj dhe me përvojë ndërkombëtare.
Njëri prej objektivave kryesorë për merkaton e verës është mesfushori i Bayer Leverkusen, Granit Xhaka.
Sipas mediave turke, Galatasaray ka nisur hapat konkretë drejt këtij transferimi të bujshëm. Presidenti i klubit, Dursun Özbek, i ka dhënë autorizim të plotë menaxherit të njohur George Gardi – figurë kyçe në shumë prej transferimeve të fundit të suksesshme të klubit – për të udhëhequr negociatat me palën e lojtarit.
Si hap i parë konkret, Gardi ka ftuar menaxherin e Xhakës në Stamboll për të zhvilluar takimin e parë zyrtar, i cili pritet të mbahet javën e ardhshme. Në këtë “samit transferimesh” do të jetë i pranishëm edhe një përfaqësues i lartë i Galatasaray-it, duke e shtuar rëndësinë dhe seriozitetin e bisedimeve.
Në tryezën e diskutimeve pritet të vendosen termat e kontratës që klubi turk do t’i ofrojë mesfushorit me përvojë të madhe ndërkombëtare, si dhe të negociohet çmimi i kartonit të tij. Agjenti i Xhakës i ka garantuar klubit se Bayer Leverkusen do të jetë i gatshëm të pranojë shumën që do të dakordohet në këtë takim.
Granit Xhaka, 32 vjeç, ka kontratë me klubin gjerman deri në vitin 2028 dhe vlera e tij aktuale në treg vlerësohet rreth 17 milionë euro. Megjithatë, për një ofertë të favorshme dhe një projekt ambicioz, nuk përjashtohet që Xhaka të pranojë një kapitull të ri në Turqi, te një klub me histori dhe aspirata të mëdha evropiane.
