Më pak se tri javë para “El Clásico”-s së parë të sezonit mes Real Madridit dhe Barcelonës, katalanasit kanë marrë një lajm shumë pozitiv në lidhje me gjendjen e Lamine Yamal-it.
Trajneri Hansi Flick kishte shprehur dyshime për praninë e talentit spanjoll në përballjen e madhe të planifikuar për 26 tetor, por raportimet më të fundit nga e përditshmja ‘Marca’ tregojnë se situata po përmirësohet ndjeshëm. Sipas burimeve të afërta me klubin, Yamal jo vetëm që pritet të jetë gati për duelin ndaj Real Madridit, por mund të kthehet në fushë edhe më herët, ndoshta që në ndeshjen kundër Girona-s.
Sulmuesi 18-vjeçar po ndjek një program intensiv rehabilitimi dhe, nëse gjithçka shkon sipas planit, do të rikthehet në stërvitje me grupin më 18 tetor. Kjo do t’i mundësonte të luante fillimisht në ndeshjen e Champions League kundër Olympiacos-it, përpara sfidës së madhe në “Santiago Bernabéu”.
Kujtojmë se Yamal nuk udhëtoi me kombëtaren spanjolle në grumbullimin e fundit, pasi u detyrua të tërhiqej për shkak të një shqetësimi fizik. Megjithatë, rikuperimi i shpejtë i tij është një lajm i madh për Barcelonën, e cila shpreson ta ketë gati “xhevahirin” e vet për ndeshjen më të rëndësishme të muajit.
