Edon Zhegrova mund të jetë një nga emrat e merkatos së Lazio
.
Sipas mediave italiane, klubi kryeqytetas po shqyrton mundësinë për të afruar sulmuesin anësor të Juventusit në formën e huazimit për një sezon, pa detyrim blerjeje.
Trajneri i Lazio, Gennaro Gattuso, kërkon alternativa të reja për repartin ofensiv dhe profili i Zhegrovës vlerësohet për shpejtësinë, teknikën dhe aftësinë në duelet një kundër një. Futbollisti me këmbën e majtë mund të luajë në krahun e djathtë të sulmit, por edhe të shërbejë si alternativë për Mattia Zaccagni në krahun e kundërt.
Formula e huazimit pa detyrim blerjeje do të ishte e pranueshme edhe për Juventusin. Një tjetër element që favorizon operacionin është paga e 27-vjeçarit, rreth 2.5 milionë euro në sezon, e cila, sipas raportimeve, do të mbulohej nga klubi bardhezi.
Lazio po e konsideron Zhegrovan si një alternativë ndaj emrave të tjerë në listën e klubit, ndërsa konkurrenca për sulmuesin Harder po bëhet gjithnjë e më e fortë. Në favor të Zhegrovës është edhe eksperienca e tij në futbollin italian. I transferuar te Juventusi në vitin 2025, kosovari regjistroi 20 paraqitje sezonin e kaluar. Edhe në ndeshjen e debutimit ndaj Frosinones ai u aktivizua në pjesën e dytë, duke zëvendësuar Conceição.
Megjithatë, Lazio ende nuk ka bërë lëvizjen përfundimtare. Klubi duhet fillimisht të konkretizojë një largim në repartin ofensiv, për të krijuar hapësirën e nevojshme.
Nëse kjo çështje zgjidhet, emri i Edon Zhegrovës mund të rikthehet në qendër të merkatos së Lazio, me huazimin nga Juventusi që mbetet një mundësi konkrete për t’u ndjekur.
