Sot u bë zyrtare se Jordi Alba do të largohet nga Barcelona në fund të këtij sezoni.
Alba ka vendosur që të largohet nga Barcelona me efekt të menjëhershëm pas plot 11 vitesh në klub.
Alba ka negociuar me Barçën gjatë ditëve të fundit, ku do të largohet nga klubi më 1 qershor. Mbrojtësi spanjoll kishte kontratë me Barcelonën deri në qershor të vitit 2024, por vendosi të largohet që t’i krijojë hapësirë klubit të bëjë transferime të reja këtë verë.
Tani, largimin e Albas nga Barça e ka komentuar edhe superylli argjentinas dhe ish-bashkëlojtari te Barcelona Lionel Messi.
“Ishe më shumë se një mik, një partner i vërtetë në fushë. Dhe sa mirë është që gjithmonë kënaqemi së bashku dhe sa mirë kalojmë bashkë. Tashmë e dini që unë gjithmonë e dua më të mirën për ju dhe për familjen tënde, shpresoj që faza e re do të sjell sukses dhe gëzim ty. Faleminderit për gjithçka, Jordi. Një përqafim të madh”, tha Messi.
Përgjatë 11 viteve me klubin, Alba arriti të bëjë 458 paraqitje në të gjitha garat, ndërsa fitoi gjashtë trofe të La Ligas, një trofe të Ligës së Kampionëve, një trofe të Super Kupës së UEFA-s, një trofe të Kupës së Botës për klube, katër trofe të Super Kupës së Spanjës dhe pesë trofe të Kupës së Mbretit.
