David Vija njihet si një nga sulmuesit më të mirë spanjollë të të gjitha kohëve dhe pjesë të karrierës së tij të suksesshme e ka kaluar edhe në radhët e Barcelonës, duke luajtur përkrah Lionel Mesit në një sulm ëndrrash te katalanasit. “El Guaje” vazhdon të jetë i lidhur me këtë skuadër dhe ka treguar se ndjek me shumë interes ecurinë e ekipit të drejtuar nga Hansi Flik.
“Tani nuk po kalon një moment të mirë, është normale, por Barça mbetet Barça. Është një klub ku nuk mjafton të jesh i dyti, gjithçka varet nga fitoret. Njoh mirë preferencat e tifozëve të klubit dhe mendoj se janë të lumtur që klubi po i beson lojtarëve të La Masia, luan një futboll të madh dhe po lufton për majat e klasifikimit. Do të luftojë për gjithçka pasi ka futbollistë të nivelit botëror. Është e pamundur të mendosh për një turne dhe të mos e shohësh Barcelonën si një nga ekipet që mund të fitojë titullin”, tha ish-sulmuesi spanjoll, i cili më pas u ndal edhe te ylli i ri i kësaj skuadre, Lamin Jamal.
“Një djalosh i pabesueshëm. Si luan, si e kupton futbollin… Është e vërtetë që nuk e njoh personalisht, por kam qenë në stadium disa herë dhe më duket shumë i qetë dhe i përqendruar. Nuk bëhet fjalë për shpërthimin e një lojtari që do të zgjatë vetëm disa muaj. Ka kohë që po tregon vlerat e tij dhe përndryshe nga sa mendohet, vazhdon të rritet. Është me të vërtetë i aftë dhe çdo herë që e sheh të luajë, përmirësohet. Përveç kësaj, e di se çfarë do të thotë të jesh një kampion.
Krahasim me Mesin? Asnjëherë! Mendoj se të krahasosh çdo lojtar me Mesin është e vështirë në ditët e sotme, Lamin Jamal është që tani një yll botëror. Ka arritur gjëra të rëndësishme në dy vite dhe si tifoz i Barçës, më entuziazmon përsëri. Dhe tifozët kanë të drejtë të ëndërrojnë me të. Por nuk besoj se është e nevojshme ta krahasojmë me Mesin, pasi ai do të ketë një karrierë fantastike”, tha Vija.
PANORAMASPORT.AL
