Roma arriti për herë të dytë radhazi në një finale Europe. Pas suksesit në Tiranë në Ligën e Konferencës, verdhekuqtë do të synojnë edhe Ligën e Europës ndaj Seviljas. Të shumta do të jenë figurat në stadiumin “Puskas Arena” në Budapest, por një mungesë e madhe në tribunë do të jetë ajo e Daniele De Rosit.
Ish-mesfushori italian që ka shkruar histori me fanellën e Romës nuk do të jetë prezent në finale dhe vetë ai e ka pranuar diçka të tillë nëpërmjet një postimi në Instagram. Vajza e tij, Gaia ka ceremoninë e diplomimit dhe natyrisht, De Rosi nuk mund të ndiqte Romën para vajzës.
“Mirëmëngjesi të gjithëve… Jo, nuk kam bileta për finalen e Budapestit. Nuk mund t’i siguroj, nuk mund të blej, nuk kam lidhje dhe nuk do të telefonoj lojtarët, sepse supozoj se edhe ata do të marrin një mijë mesazhe në ditë.
Roma përmes Vito Skala, me dashamirësi, më ftoi dhe me keqardhje të madhe mu desh të refuzoja. Por kur një pjesë e zemrës tënde diplomohet, nuk mund ta humbasësh dhe nuk ka finale që të pengon. Ah, nëse keni blerë biletën e avionit dhe keni rezervuar edhe hotelin, por nuk e keni biletë për ndeshjen, atëherë jeni budallenj të dyfishtë”, shkruan De Rosi.
PANORAMASPORT.AL
