Leva financiare më e fundit e Barcelonës i ka siguruar klubit katalanas jo pak, por plot 120 milionë euro. Mediat spanjolle e kanë etiketuar gati një levë fantazmë. Por Laportës pak i intereson.
Atij i intereson se në arkat e klubit ka milionat e mjaftueshme për të federuar lojtarët e ardhur në merkaton e verës dhe lojtarët që kanë rinovuar me klubin.
Të premten, Barcelona ka zyrtarizuar se “LIBERO Football Finance AG” dhe këshilltarët e investimeve private “NIPA Capital BV” janë bërë partnerë të rinj të “Bridgeburg Invest”, marka tregtare e “Barça Vision”.
Këta investitorë kanë marrë 29.5% të pronësisë së “Barça Vision” për 120 milionë euro që korrespondojnë me një pjesë të pjesëmarrjes që ishte në duart e “Socios.com” dhe “Orpheus Media”.
Me këtë lëvizje, Barcelona arrin të përforcojë strukturën e saj me partnerë strategjikë që ofrojnë njohuri dhe përvojë në kërkimin e mundësive të biznesit që lidhen me industrinë e sportit. Kjo levë duhet të bëjë të mundur regjistrimin e lojtarëve kryesorë të Barçës.
PANORAMASPORT.AL
