Sulmuesi i Barcelonës, Robert Lewandowski, raportohet se është i gatshëm të bëjë sakrifica të mëdha financiare për të vazhduar aventurën e tij në “Camp Nou” edhe sezonin e ardhshëm.
Kontrata e polakut 37-vjeçar skadon verën e ardhshme dhe e ardhmja e tij ka qenë vazhdimisht në qendër të diskutimeve. Ndërkohë që Barcelona e drejtuar nga Hansi Flick po vlerëson alternativa për pasuesin afatgjatë të tij, Lewandowski nuk ka hequr dorë nga dëshira për të mbetur në ekip.
Sipas raportimeve, ai është i gatshëm të pranojë një ulje të ndjeshme të pagës dhe një rol dytësor, vetëm që klubi të pranojë t’i rinovojë kontratën edhe për një vit.
Megjithatë, Barcelona ende nuk ka marrë asnjë vendim, dhe çështja e së ardhmes së tij pritet të diskutohet gjatë muajve në vijim.
Pavarësisht moshës dhe rënies së lehtë të performancës këtë sezon, Lewandowski vazhdon të jetë një lojtar vendimtar dhe një lider i rëndësishëm për ‘blaugranat’. Nën drejtimin e Flick, ai ka qenë pjesë kyçe e rikthimit të Barcelonës në një nivel kompetitiv, duke shënuar tetë gola në 12 ndeshje të La Ligas këtë edicion.
E ardhmja e tij mbetet e hapur, por vullneti i polakut për të qëndruar tregon qartë lidhjen e fortë që ai ka krijuar me klubin dhe qytetin.
