Kompania e basteve “Paddy Power” i ka lënë lojtarët të habitur pasi pagoi bastet e vendosura për Liverpulin që fiton Premier Ligën, pas humbjes së Arsenalit ndaj Uest Hemit, e cila mund të rezultojë fatale për garën e tyre për titull.
Skuadra e Mikel Artetës shkonte në ndeshjen e së shtunës në “Emirates” duke kërkuar të përfitonte nga ngadalësimi i Liverpulit kundër Aston Vilës, pasi “Reds” barazuan në mesjavë. Por me mundësinë për ta ngushtuar diferencën momentale në pesë pikë me kryesuesit e kampionatit, Arsenali ishte pa dhëmbë në derbin e Londrës, dhe djemtë e Graham Poterit arritën një fitore komode në “Emirates”. Duke i dhënë fund një serie prej katër ndeshjesh pa fitore, goditja e Bouenit në fundin e pjesës së parë, bëri diferencën për Uest Hemin, me problemet e Arsenalit që u vështirësuan pas përjashtimit të Majls LjuisSkelit me karton të kuq në pjesën e dytë.
Dhe ende pa u luajtur ndeshja Mançester SitiLiverpul, për kompaninë e basteve “Paddy Power”, humbja e “Topçinjve” mjaftoi për t’i bindur ata se gjithçka ka marrë fund në garën për titull në Premier Ligë. “Paddy Power” njoftoi se ka vendosur të paguajë bastin e vendosur se Liverpuli do të shpallet kampion në Premier Ligë këtë sezon, jo më shumë se tre muaj nga java e fundit e kampionatit.
Duke postuar vendimin e tyre në platformën “X”, ata shkruanin: “Kemi parë mjaft. Me humbjen e Arsenalit ndaj Uest Hemit, gara për titull ka përfunduar. Pra, ne po paguajmë bastet që Liverpuli fiton Premier Ligën 2024-2025”. I prekur nga mungesa e opsioneve në sulm, Arteta zgjodhi të fuste Mikel Merino në sulm edhe një herë tjetër pas heroizmave të tij kur hyri zëvendësues kundër Lestërit javën e kaluar dhe shënoi dy golat e fitores në fund. Megjithatë, përballë një mbrojtësi me cilësi shumë më të lartë se ai i “Dhelprave”, Merino dukej si një peshk jashtë ujit që endej në sulm, me Arsenalin që nuk mundi të bënte shumë në sulm gjatë gjithë ndeshjes.
Përgatiti: ANDROKLI DRALO – PANORAMASPORT.AL
