Lorik Cana bëri një kthim emocional në “Stadium of Light” të Sunderlandit, duke qenë i pranishëm në tribuna gjatë barazimit 1:1 të Sunderlandit kundër Aston Villas të dielën.
Pas përfundimit të pjesës së parë, Cana doli në fushë për të përshëndetur tifozët e pranishëm, një moment i veçantë për ish-kapitenin shqiptar.
“Ishte vërtetë e veçantë. Të kthehem këtu pas 15 vitesh është emocionuese, veçanërisht pasi klubi është përsëri në Premier League, aty ku e meriton”, deklaroi Cana në një intervistë për faqen zyrtare të Sunderlandit.
Ashtu si kapiteni aktual i Sunderlandit, Granit Xhaka, edhe Lorik Canës i ishte dhënë shiriti i kapitenit kur mbërriti te klubi në vitin 2009. Për Sunderlandin, ai luajti 35 ndeshje dhe la një përshtypje të thellë te tifozët.
Gjatë karrierës së tij, Cana ka luajtur edhe për klube të njohura europiane si Paris Saint-Germain, Marseille, Galatasaray, Lazio dhe Nantes.
Në nivel kombëtar, ai përfaqësoi Shqipërinë në 92 ndeshje, duke u bërë një nga ikonat e futbollit shqiptar.
