Trajneri i PSG, Luis Enrique, foli për mediat para ndeshjes që kampionët e Francës do të luajnë sot në Ligue 1 kundër Lyon. Ai deklaroi se nuk janë të demoralizuar nga dëmtimet e fundit të lojtarëve.
Enrique u shpreh se ekipi i tij, që renditet i dyti, nuk ka asnjë problem të përballet me Lyon, kryesuesin e kampionatit. Ndeshja u shty pas kërkesës të policisë së Parisit, në mes të një vale protestash të dhunshme në kryeqytetin francez.
Lyon e kryeson renditjen falë diferencës së golave. Ndeshja do të nisë pak minuta para se të përfundojë ceremonia e Topit të Artë. PSG-ja ka një numër rekord prej 10 të nominuarish, mes të cilëve spikasin Ousmane Dembele dhe Fabian Ruiz.
“Nuk më intereson aspak. Unë mbetem i përqendruar te ndeshja,” tha Luis Enrique, që shtoi: “Shumë nga lojtarët tanë mund ta fitojnë atë trofe. Do të shohim se kush do ta marrë çmimin, por kjo nuk ndryshon asgjë në lidhje me atë që ne synojmë si ekip.”
PSG-ja humbi tre lojtarë për shkak të dëmtimeve gjatë fitores së tyre në Champions League kundër Barcelonës. Dembele dhe Marquinhos pësuan dëmtime në kofshë, ndërsa Khvicha Kvaratskhelia duhet t’i nënshtrohet një operacioni në gju.
“Është e vështirë të mbetesh pozitiv pas një lajmi si ky. Është një rrezik që vjen me të qenit lojtar profesionist. Do të vazhdojmë si zakonisht. Nuk dua të ndryshoj asgjë nga ajo që kam bërë, por në të njëjtën kohë, dua t’i ndryshoj të gjitha”, tha trajneri spanjoll.
“Kjo është ajo që duhet të bësh për të mbetur i paparashikueshëm. Nuk do ta ulim ritmin. Ne jemi një familje. Kemi dy ose tre lojtarë jashtë fushës për shkak të dëmtimeve, por kjo është pjesë e garës në nivelin më të lartë“, tha Enrique.
