Portieri i Gjeorgjisë ka analizuar duelin e radhës me Spanjën, i vlefshëm për 1/8-at e Euro 2024. Portieri i Valencias së bashku me Kvaratskhelian kanë qenë lojtarët kyç të suksesit të ekipit të Sanjol në fazën e grupeve ku arritën që të kualifikoheshin pasi mundën Portugalinë e Kristiano Ronaldos.
“Për mendimin tim Spanja është skuadra favorite për të fituar Europianin. Krahasuar me Spanjën, Gjeorgjia është një vend i vogël me zemër të madhe. Në këtë ndeshje do të luftojmë deri në fund dhe të shikojmë se si do të jenë shifrat”, tha portiere i talentuar gjeorgjian.
I pyetur për armët e përfaqësueses së tij, Mamardashvili u përgjigj: “Na duhet që të qëndrojmë mirë në mbrojtje e të mos hapim shumë hapësira. Duhet të jemi të durueshëm e të presim rastet tona pasi në sulm kemi lojtarë, të cilët mund t’I bëjnë dëme Spanjës”.
Në këtë pikë gazetari e pyet portierin nëse Kvaratskhelia do të ishte një armë e fortë e Gjeorgjisë për këtë duel. “Mendoj se Kvara është më i miri se e gjithë skuadra e Spanjës”, tha Mamardashvili.
