Manchester City nuk ka shkuar dot më shumë se barazimi 1-1 në transfertën në Londër ndaj West Ham, në ndeshjen e vlefshme për javën e 30-të në Premier League.
“Qytetarët” gjetën të parët avantazhin në minutën e 31-të, ku pas një aksioni të shpejtë dhe asistit të Omar Marmoush, Bernardo Silva futet bukur në zonë dhe kur të gjithë prisnin pasimin e tij, ai e dërgon topin në rrjetë me një goditje të bukur parabël.
Në minutën e 35-të, Mavropanos barazoi shifrat duke shënuar me kokë, pas krosimit të Jarrod Bowen nga goditja e këndit. Pjesa e parë është mbyllur në barazim 1-1.
Rezultati nuk ndryshoi as në pjesën e dytë, pavarësisht zëvendësimeve të kryera nga të dy ekipet dhe sidomos udhëzimeve të Pep Guardiolës nga telefoni, pasi spanjolli e ndoqi ndeshjen nga tribuna, për shkak pezullimi.
Pas këtij hapi fals të Man. City, diferenca me vendin e parë që mbahet nga Arsenal është 9 pikë, vetëm se londinezët kanë një ndeshje më shumë.
