Pas barazimit të bukur në Paris ndaj Francës, Italia e Roberto Mancinit synon fitoren ndaj Turqisë, sonte në mbrëmje në Bologna. Trajneri konfirmon optimizmin: “Gjëja më e rëndësishme në një grup është të besosh te vetja dhe të mendosh se mund të arrish çdo rezultat”.
Edhe pa Moise Kean, i larguar nga grumbullimi për shkak të problemeve fizike, Mancini ka besim te skuadra: “Cilësitë teknike lojtarët i kanë dhe, kur të jenë më të ndërgjegjshëm për atë që vlejnë, mund të bëjnë shumë. Formacioni? Do të ndryshojmë diçka”.
Për Turqinë, ai paralajmëroi: “Montella ka bërë një punë të madhe, duke e çuar kombëtaren turke në Botëror dhe në Ligën A të ‘Nations League’. Nuk do të jetë një ndeshje e paracaktuar. Turqia është një skuadër e shkëlqyer. Nuk duhet ta nënvlerësojmë vetëm sepse humbi me Belgjikën. Gabimi që nuk duhet të bëjmë është të mendojmë se do të jetë e lehtë”.
Në fund, Mancini pranoi: “Në këtë grumbullim u argëtuam, shpresoj edhe lojtarët. Tani duhet ta mbyllim bukur”. Për formatin me katër ndeshje: “Nuk e di, mendoj se kështu është shumë e lodhshme, sidomos për futbollistët”.
