João Félix nuk ishte pjesë e listës së lojtarëve në dy ndeshjet e fundit të Chelsea-t, ndaj Astanas dhe Brentfordit. Arsyeja e mungesës së ndërkombëtarit portugez nuk u zbulua nga klubi londinez, por trajneri i “blues”, Enzo Maresca, bëri të ditur datën e mundshme të rikthimit të tij.
“João Félix dhe Romeo Lavia mund të jenë të disponueshëm për ndeshjen e ardhshme,” tha trajneri, i cili foli edhe për të gjitha mungesat në skuadër: “Carney (Chukwuemeka), pas ndeshjes ndaj Astanas, ishte i sëmurë. Chilly (Ben Chilwell) ishte gjithashtu i sëmurë. Pedro (Neto) u pezullua, dhe më pas kishim Reece (James) dhe Wes (Fofana) të dëmtuar. Për fat të keq, gjatë seancës së të shtunën, Benoit (Badiashile) ndjeu diçka dhe Misha (Mudryk) gjithashtu është jashtë.”
Félix ka shënuar pesë gola dhe ka dhënë dy asistime në 15 ndeshje këtë sezon. Chelsea do të luajë të enjten e ardhshme ndaj Shamrock Rovers nga Irlanda, në një ndeshje të vlefshme për Ligën e Konferencës.
