Arsenali ka lidership të mjaftueshëm brenda grupit aktual të lojtarëve për sezonin e ardhshëm 2023/24.
Ky është mendimi i sulmuesit anësor, Gabriel Martinelli, i cili ka folur për largimin e mesfushorit shqiptar, Granit Xhaka që u transferua te Bayer Leverkusen.
Martinelli beson se ka ende shumë lidership brenda dhomës së zhveshjes së Topçinjve, edhe nëse ata kanë humbur një lojtarë me përvojë.
“Graniti është një djalë i mirë, një lojtar i mirë dhe ai ishte një nga kapitenët në ekip”, ka thënë fillimisht Martinelli për gazetarët.
“Por, ne kemi shumë opsione. Ai ishte gjithmonë aty për të më ndihmuar, por ne do të gjejmë dikë tjetër për ta bërë këtë”.
“Sigurisht, ne patëm rastin të themi lamtumirë. Ne folëm në ndeshjen e fundit dhe ai është një djalë i mrekullueshëm dhe shpresoj që të bëjë mirë këtë sezon”.
“I uroj më të mirën atij dhe familjes së tij”, përfundoi sulmuesi brazilian.
