Situata te PSG në fund të këtij viti nuk është ndër më të mirat dhe aspak e qetës, siç pretendohej të ishte pasi u larguan emra si Mesi e Nejmar të cilët akuzoheshin se krijonin shpërqendrim brenda në grupin e futbollistëve. Problemi tashmë është Kilian Mbape dhe raporti i tij me trajnerin Luis Enrike, që nuk është ndër më të mirët, përkundrazi.
“Lufta e ftohtë” ka nisur prej kohësh, por pas ndeshjes kundër Borusia Dortmund u bë publike, Në atë sfidë, Luis Enrike i kërkoi ekipit të ulte rimtin për të ruajtur barazimin pasi kishte frike se mos pësonte gol e eliminohej nga Liga e Kampioneve. Nga ana tjetër, Mbape u inatos pasi kërkonte që skuadra të shënonte një tjetër gol e të merrte vendin e parë në grup.
“Një nga vendimet më të mira të karrierës time”, tha Luis Enrike pas ndeshjes, duke bërë të qartë se pretendimet e Mbape ishin të kota. Dy ditë më vonë, në ndeshjen ndaj Lilës, Mbape shënoi dhe nuk festoi, i pakënaqur me pozicionin që i kishin dhënë në fushë shpeshherë gjatë sfidës.
“Mbape luan ku vendos ai”, tha Luis Enrike pas asaj sfide, duke shtuar se “nuk kishte fuqi mbi të”. Një mesazh i qartë se francezi ishte ai që kishte problemin me trajnerin dhe jo e kundërta, pasi tekniku i kishte dhënë liri të plotë. Një situatë që ka ndezur edhe më shumë aludimet se në fund të këtij sezoni, vetëm një prej tyre mund të vazhdojë në radhët e parisienëve, sido që të vazhdojë rrugëtimi i skuadrës në Ligën e Kampioneve që është objektivi primar.
PANROAMASPORT.AL
