Mbappé do të jetë një nga yjet e Kupës së Botës së ardhshme. Po, mendimet e asit francez janë tashmë tek turneu më i pritur, që zhvillohet në Shtetet e Bashkuara, Kanada dhe Meksikë. Sezoni i tij me Real Madridin ishte për t’u harruar, jo dhe aq shumë nga këndvështrim personal (41 gola në 41 paraqitje në kupë dhe ligë), por për sa i përket trofeve të fituar: zero. Zhgënjimi i fundit ishte të shihje rivalët e Barcelonës duke fituar La Ligën falë një fitoreje 2-0 në El Clásico, të cilën Mbappé e humbi për shkak të një dëmtimi. Të gjithë e presin atë në Kupën e Botës.
Mbappé dhe Kupa e Botës me Francën – “Nuk ka asgjë më të mirë sesa të përfaqësosh vendin tënd. Bëhesh pjesë e galaktikës së lojtarëve ndërkombëtarë. Është e vështirë të gjesh veten në një situatë si e jona, ku të gjithë presin që ne të bëjmë mrekulli. Por mrekullitë ndodhin vetëm në fushë: nuk kemi nevojë ta luajmë ndeshjen para ndeshjes”, tha sulmuesi për Vanity Fair në një intervistë të gjatë, duke u përqendruar në Kupën e Botës që do të luajë me Francën. Ata do të përpiqen të kompensojnë zhgënjimin e katër viteve më parë në finalen kundër Argjentinës: “Duhet të ecim përpara. Nuk mund të kthehemi pas. Duhet ta marrim atë zhgënjim dhe ta shndërrojmë në motivim për të provuar të ndryshojmë vërtet rrjedhën e historisë dhe t’i japim vetes mundësinë për të arritur një finale tjetër, e cila do të jetë jashtëzakonisht e vështirë, dhe të përpiqemi ta sjellim në shtëpi atë yll të tretë”, shpjegoi Mbappé.
Mbappé: Më shqetëson të shoh njerëz të caktuar… “Kur je mjaftueshëm me fat që ke një pagë të madhe, që je multimilioner, që mund të udhëtosh me një avion privat, më shqetëson pak të shoh këto figura sportive duke u dhënë leksione njerëzve që… mezi ia dalin mbanë. Mund të jesh lojtar, mund të jesh yll ndërkombëtar, por para së gjithash, je qytetar. Ne nuk jemi të shkëputur nga bota. Nuk jemi të shkëputur nga ajo që po ndodh në vendin tonë. Ndonjëherë njerëzit mendojnë se, për shkak se ke para, për shkak se je i famshëm, këto lloj problemesh nuk të shqetësojnë. Por ato më shqetësojnë mua, sepse e di se çfarë do të thotë dhe çfarë pasojash mund të ketë për vendin tim kur këta lloj njerëzish marrin pushtetin. Pra, ne jemi qytetarë. Kemi të drejtë të shprehim mendimin tonë si të gjithë të tjerët”, shtoi Mbappé.
“Ndonjëherë ndihem sikur nuk jam vetvetja” – “Është fantastike. Sigurisht, është e vështirë, sepse ndihesh sikur nuk i përket më vetes, sikur i përket të gjithëve. Por në të njëjtën kohë, është një jetë që e zgjodhëm. Ndoshta jo në këtë masë, por gjithsesi e zgjodhëm. E vumë veten në rrezik. Dhe është e vështirë të përqendrohesh në aspektet negative kur miliona e miliona njerëz shprehin mirënjohjen, njohjen dhe dashurinë e tyre. Kështu që e gjej paksa mosmirënjohëse të ankohem. Nuk e kam trajtuar gjithmonë mirë këtë situatë sepse u bëra i famshëm në një moshë shumë të re. Dhe kështu nuk kisha mençurinë, mendjehapurinë ose empatinë për ta vënë veten ndonjëherë në këpucët e njerëzve dhe për të kuptuar se ndonjëherë do të më shohin vetëm një herë, kurrë më nuk do të më shohin përveçse në televizion. Kështu që tani përpiqem të jem pak më empatik, edhe nëse ndonjëherë njerëzit i tejkalojnë kufijtë e tyre”, theksoi ylli i Real Madridit.
Mbappé dhe kritikat – Lidhur me sulmet që lojtarët ndonjëherë i pësojnë nga publiku francez për shkak të origjinës së tyre, Mbappé përgjigjet në mënyrë diplomatike: “Mendoj se është thjesht një çështje kulturore. Ne jemi francezë, francezëve u pëlqen të ankohen. Francezëve u pëlqen të jenë të palumtur. Ne jemi thjesht francezë. Pra, francezët që gjykojnë francezët e tjerë, është normale. Mendoj se një francez është më i lumtur kur është i palumtur. Sepse është e vërtetë, ne kritikojmë gjithçka. Dhe unë them ‘ne’ sepse edhe unë jam i tillë”.
