Kylian Mbappe tha se ai mezi po pret për t’u bashkuar me klubin e tij të ardhshëm, që besohet të jetë Real Madridi, por hezitoi të tregonte nëse do të mbështesë Los “Blancos” në finalen e Ligës së Kampionëve kundër Borussia Dortmundit.
Mbappe ka njoftuar tashmë se ai nuk do të rinovojë kontratën e tij me Paris Saint-Germain e cila skadon më 30 qershor, dhe megjithëse as ai dhe as Madridi nuk kanë konfirmuar se kanë arritur një marrëveshje, transferimi i tij i lirë në Spanjë besohet se është i përfunduar.
“Dua të jem i lumtur”, tha Mbappe, pasi fitoi çmimin “Lojtari më i mirë” në “Globe Soccer Awards Europe Edition”..
“Do të largohem nga vendi im për herë të parë. Do të jetë një përvojë e mrekullueshme dhe mezi pres të jem në klubin tim të ri. Dua të fitoj trofe… Kur flisni për futbollin, është për fitimin e trofeve, duke qenë me shokë të rinj të skuadrës”, shtoi ai.
“Tani, unë kam kontratën time me PSG-në… Të gjithë e dinë se së shpejti po përfundon dhe ne do të shohim se çfarë do të ndodhë”.
Madridi është sigurisht në prag për t’u kurorëzuar Mbreti i Evropës për herë të 15-të rekord me kusht që të mund ta mposhtë Borussia Dortmundin në finalen e Ligës së Kampionëve.
Pavarësisht se ka shumë të ngjarë të jetë i lidhur me Madridin, megjithatë, Mbappe këmbënguli se nuk do të bëjë tifo për ndonjërën skaudër.
“Jo – thjesht do ta shikoj finalen si ju”, tha ai duke buzëqeshur. “Kur e doni futbollin, shikoni çdo ndeshje. Unë shikoj çdo ndeshje kur mundem … në Francë, Angli, Spanjë, Gjermani, Itali. Çdo ligë. Pra, sigurisht, do të shikoj Ligën e Kampionëve,” përfundoi Mbappe.
