Ka përfunduar faza e parë e kampionatit “Abissnet Superiore” 2024-2025. Ndeshja e fundit e javës së 9-të ishte AF Elbasani – Partizani, që u transmetua drejpërdrejt në RTSH Sport.
Në stadiumin “Elbasan Arena” ishte një ndeshje e luftuar nga të dyja ekipet, por në fund sfida u mbyll në barazim 1-1. Pas përfundimit të fazës së parë, “Të kuqtë” kryesojnë renditjen me 16 pikë, të ndjekur nga Egnatia dhe Dinamo që kanë nga një pikë më pak (15).
Skënderbeu u rikthye te fitorja, pasi mundi Bylisin në transfertë me rezultatin minimal 1-0. Të shtunën u luajtën tre ndeshjet e tjera të javës së 9-të. Egnatia – Teuta dhe Tirana – Dinamo City u mbyllën në barazim pa gola 0-0. Laçi u rikthye te triumfi në shtëpi. Djemtë e Francesco Moriero fituan ndaj Vllaznisë 3-1.
Renditja tregon se do të jetë një kampionat i luftuar, pasi në përfundim të fazës së parë vetëm 2 pikë ndajnë Teutën e vendit të 6-të nga kreu i renditjes. Bylisi dhe Laçi janë dy skuadrat që aktualisht qëndrojnë në zonën që të zbret në Kategorinë e Parë.
