“Special One” jep mendimin për favoritët e Botërorit dhe të ardhmen e tij, mes pasionit për futbollin e përditshëm dhe dilemave për të drejtuar një kombëtare: “Kush e fiton Botërorin? Do të më pëlqente Portugalia, që ka potencial për ta fituar. Carletto është Carletto, edhe pse njerëzit nuk besojnë se Brazili mund t’ia dalë.
Për mua një gjë është Brazili me Ancelottin dhe një tjetër pa të. Mendoj se mund ta fitojë titullin. Argjentina është kampione bote në fuqi dhe më duket ekip i vërtetë: të bashkuar, kompaktë, që kanë kënaqësi të luajnë për kombëtaren.
Dhe pastaj Franca, që me gjithë talentin që ka mund të bëjë tri skuadra konkurruese. Një ditë do të vijë edhe momenti i Anglisë… Megjithatë, mendoj të jem me pushime deri në çerekfinale. Ka shumë skuadra që do të shkojnë aty vetëm për të humbur. Nga çerekfinalet fillon festa e vërtetë”.
Për ta mbyllur, një batutë për të ardhmen. Me hijen e një rikthimi të mundshëm te Real Madridi, portugezi nuk ndihet ende gati për t’u bërë trajner kombëtareje: “Mendoj për këtë, por pastaj mendoj edhe për jetën time pa futboll klubesh; pa stërvitur çdo ditë, pa fituar, humbur dhe barazuar tri herë në javë. Të jem i lumtur, i trishtuar, i frustruar, të dua të përmirësohem…, nuk arrij ta imagjinoj jetën time pa këto gjëra. Nuk ka ardhur ende momenti për një kombëtare”.
