Një alarm për bombë ka vënë në lëvizje Policinë e Shtetit, pasi në adresat elektronike zyrtare të disa institucioneve shtetërore është dërguar një mesazh kërcënues, ku pretendohet se janë vendosur lëndë shpërthyese në ambientet e tyre.
Pas marrjes së njoftimit, Policia e Shtetit ka nisur menjëherë verifikimet për të vlerësuar situatën dhe për të përcaktuar vërtetësinë e kërcënimit.
Sipas njoftimit zyrtar të policisë, deri në këto momente nuk është evidentuar asnjë rast i vendosjes së lëndëve shpërthyese në institucionet e përmendura.
“Në adresat elektronike zyrtare të disa institucioneve shtetërore është dërguar një mesazh kërcënues, në të cilin pretendohet për vendosjen e lënde shpërthyese në ambientet e tyre.
Policia e Shtetit ka nisur menjëherë verifikimet. Deri tani, nuk është evidentuar asnjë rast i vendosjes së lëndëve shpërthyese.
Nën drejtimin e Prokurorisë, strukturat e specializuara të Policisë së Shtetit vijojnë punën për identifikimin e burimit të mesazhit”, thuhet në njoftim.
/rtsh.al/
