Lionel Mesi ka dhënë një intervistë të gjatë për “Titan Sports” në të cilën ka folur për Guardiolën dhe Barcelonën. Gjithashtu sulmuesi argjentinas foli edhe për Topin e Artë si dhe për të ardhmen e tij.
Cila është marrëdhënia juaj me Guardiolën?
“Kam mbajtur kontakte, ne flasim shpesh. Jam i kënaqur me atë që ai ka bërë, veçanërisht në Ligën e Kampioneve. Ai është trajneri më i mirë në botë, ai nuk kishte nevojë të fitonte kupën përsëri për ta provuar këtë. Përsa i përket kohës në Barcelona jam shumë i lumtur për atë që kam kaluar dhe e kam shijuar shumë. Ishte pak e çuditshme të dëgjoja tifozët të këndonin emrin tim edhe kur nuk isha. Iu jam shumë mirënjohës”.
E shihni veten trajner një ditë?
“Jo, gjithmonë kam thënë se nuk do ta bëja, vazhdoj ta ruaj këtë ide…”.
Kush do ta fitojë Topin e Artë, ju apo Haland?
“Në këtë pikë të karrierës sime, trofetë e ekipeve janë gjithmonë më të rëndësishme se ato individuale. Dhe Kupa e Botës është më e mira. Sigurisht, fitimi i Topit të Artë në këtë fazë të karrierës sime do të ishte mirë, por nëse nuk e fitoj nuk ka asnjë problem pasi ajo që më ka munguar vërtet ishte Kupa e Botës”.
Ndonjë këshillë për brezin e ri?
“Gjëja më e rëndësishme për njeriun është të shijojë atë që i pëlqen të bëjë. Karriera është e shkurtër, gjithçka kalon kaq shpejt… Është e rëndësishme të shijoni çdo moment, sepse nuk ka kthim prapa”.
PANORAMASPORT.AL
