Lionel Messi ka mbyllur aventurën e tij me kombëtaren e Argjentinës, pas më shumë se dy dekadash të mbushura me emocione, suksese dhe momente të paharrueshme.
Pas fitores 3-0 ndaj Beninit, Messi iu drejtua tifozëve përmes një mesazhi emocional, ku foli për vendimin e tij për t’i dhënë fund karrierës me fanellën “Albiceleste”.
“Dje ishte ndeshja ime e fundit dhe tashmë më mungon fanella bardheblu. E di që po marr vendimin e duhur. Ka qenë një rrugëtim i jashtëzakonshëm, me shumë gëzime, por edhe me momente të vështira”, shkroi kapiteni argjentinas.
Në mesazhin e tij, Messi falënderoi familjen, bashkëlojtarët, trajnerët dhe të gjithë tifozët që e kanë mbështetur gjatë viteve. Ai gjithashtu kujtoi legjendën e futbollit argjentinas, Diego Maradona.
“Diego nuk mund të mungojë. Ai na ka ndihmuar në çdo hap, qoftë kur ishte këtu me ne, qoftë nga qielli”, u shpreh Messi.
Mesazhi i tij tërhoqi vëmendjen edhe të Cristiano Ronaldos.
Rivali i tij i madh në futbollin botëror reagoi në komentet e postimit, duke i dërguar një mesazh respekti.
“Leo, vite të gjata duke mbrojtur vendin tënd dhe një histori që do të mbetet përgjithmonë. Gjithë respekti im për atë që ke arritur me Argjentinën. Një përqafim”, shkroi Ronaldo.
Dy yjet kanë qenë rivalë për pjesën më të madhe të karrierës së tyre, por në të njëjtën kohë kanë shfaqur vazhdimisht respekt për njëri-tjetrin.
Messi largohet nga kombëtarja si një prej figurave më të mëdha në historinë e Argjentinës.
Me “Albicelesten”, ai fitoi Kupën e Amerikës dhe Kupën e Botës në vitin 2022, duke realizuar një nga ëndrrat më të mëdha të karrierës së tij.
Ai mbetet gjithashtu golashënuesi më i mirë në historinë e kombëtares argjentinase, duke lënë pas një trashëgimi që pritet të mbetet gjatë në historinë e futbollit.
Ndërkohë, Cristiano Ronaldo vazhdon të jetë pjesë e kombëtares së Portugalisë dhe nuk ka njoftuar tërheqjen nga futbolli ndërkombëtar.
