Mike Tyson, i njohur si “njeriu më i frikshëm në botë”, ka befasuar sërish botën e sportit me deklaratat e tij të fundit. Legjenda amerikane e boksit, me mbi 40 vite karrierë profesionale, ka thënë se nuk ka ndërmend të varë dorezat dhe të largohet nga ringu.
Tyson rrëfeu një episod me djalin e tij 14-vjeçar, i cili e pyeti pse vazhdon ende të luftojë. “Për një moment nuk dija ç’ti thosha. Pastaj iu përgjigja: Sepse jam më i miri që e ka bërë këtë. Duhet ta bëj, është e vetmja gjë që di të bëj.”, tha ish-kampioni i botës.
Ishte i sinqertë edhe për anën financiare të karrierës së tij: “Kam fituar më shumë para në të 50-at e mia sesa në të 20-at. Por sot paratë nuk kanë më kuptim. E rëndësishme është që mund të kujdesem për njerëzit që dua.”
Duke folur për të ardhmen, Tyson shtoi se gjithçka varet nga interesimi i publikut: “Nëse njerëzit ndalojnë së më ofruari para, ndoshta do të jetë lufta e fundit. Por deri atëherë, do të jem në ring.”
Ai preku edhe momente të vështira të jetës së tij, duke pranuar se shpesh e kthen dhimbjen në humor: “Njerëzit mendojnë se janë shaka, por unë thjesht tregoj historinë time dhe i jap një kthesë personale.”
Në moshën gati 60-vjeçare, Mike Tyson mbetet një nga figurat më të mëdha dhe më të diskutueshme të historisë së boksit.
